blog image

StudyatChanakya Admin

Jul 22,2020

3:42pm

സസ്യലോകത്തെ സൂപ്പർസ്റ്റാറുകൾ!

നൂറു സെന്റീമീറ്ററിലധികം വ്യാസമുള്ള വമ്പൻ പുഷ്പം. അതാണ് റഫ്ലേഷ്യ. എന്നാൽ ദുർഗന്ധം കാരണം ഈ പൂവിന്റെ ഏഴയലത്ത് പോലും ചെല്ലാൻ സാധിക്കില്ല. ഇനി വേറെ ഒരു കൂട്ടരുണ്ട്. പ്രാണികളെ തിന്നുന്നതിലാണ് ആനന്ദം. കൂട്ടത്തിൽ മികച്ച കലാകാരൻമാരും ഉണ്ട്. സസ്യലോകത്തു വേറിട്ടു നിൽക്കുന്ന ഈ പുലിക്കുട്ടികളെ പരിചയപ്പെട്ടാലോ?

വലുപ്പത്തിൽ റഫ്ലേഷ്യ

ലോകത്തിലെ ഏറ്റവും വലിയ പുഷ്പമാണ് റഫ്ലേഷ്യ. അഞ്ച് ഇതളുകളുള്ള ഈ പൂവിന് പത്തു കിലോയോളം ഭാരമുണ്ടാകും. എത്ര വലുപ്പം ഉണ്ടെങ്കിലെന്താ. ചീഞ്ഞ മാംസത്തിന്റെ ദുർഗന്ധമാണ് ഈ പൂവിന്. ഒരാഴ്ചയാണ് പുഷ്പത്തിന്റെ ആയുസ്. ഇലയോ തണ്ടോ ഇല്ലാത്ത റഫ്ലേഷ്യ പരാദ സസ്യത്തിന്റെ ഗണത്തിലാണ് പെടുന്നത്. ഇന്തോനേഷ്യയിലും മലേഷ്യയിലും ആണ് റഫ്ലേഷ്യ അധികം കാണപ്പെടുന്നത്.

ഉയരക്കാരൻ ടൈറ്റൻ ആരം

ലോകത്തിലെ ഏറ്റവും ഉയരം കൂടിയ പുഷ്പമാണ് ടൈറ്റൻ ആരം. ഒറ്റ നോട്ടത്തിൽ ചേനയുടെ പൂവാണെന്നു തോന്നും. എന്നാൽ മൂന്നു മീറ്ററോളം ഉയരമുണ്ട്. കാഴ്ചയിൽ പൂവ് പോലെ തോന്നുമെങ്കിലും ഇതു ശരിക്കും പൂങ്കുലയാണ്. റഫ്ലേഷ്യ പോലെ ഈ ചെടിയും ദുർഗന്ധത്തിന് പേരു കേട്ടതാണ്. ചെടിക്ക് നൂറു കിലോയോളം ഭാരമുണ്ട്.

കില്ലർ പിച്ചർ പ്ലാന്റ്

പ്രാണികളുടെ പേടി സ്വപ്നമാണ് പിച്ചർ ചെടികൾ അഥവാ നെപ്പന്തസ്. സസ്യ വിഭാഗത്തിലെ നോൺ വെജിറ്റേറിയൻ ആണ് കക്ഷി. ഈ ചെടിയുടെ ഇലയുടെ അറ്റത്ത് നീളമുള്ള കൂജ പോലുള്ള ഭാഗമുണ്ട്. ഇതൊരു കെണിയാണ്. (ഇംഗ്ലിഷിൽ കൂജയ്ക്ക് Pitcher എന്നു പേരുണ്ടല്ലോ. ഇതിൽ നിന്നാണ് സസ്യത്തിന് ഈ പേരു വന്നത്.) ഇതിൽ മധുരമുള്ള കൊഴുപ്പു ദ്രാവകം നിറഞ്ഞിരിക്കും. ദ്രാവകം കുടിക്കാതെത്തുന്ന പ്രാണികൾ കെണിയിൽ അകപ്പെടുന്നു. ഉടനെ ഇലയുടെ അടപ്പു പോലുള്ള ഭാഗം വന്നടയും. പിന്നെ പതിയെ ഇരയെ ദഹിപ്പിച്ച് പോഷകം വലിച്ചെടുക്കും. നൈട്രജന്റെ കുറവു നികത്താനുള്ള ചെടിയുടെ സൂത്രമാണിത്. വലിയ ഇനം പിച്ചർ ചെടികൾ എലികളെയും പാമ്പിനെയും വരെ ആഹാരമാക്കാറുണ്ട്!

വീനസ് ഫ്ലൈ ട്രാപ്

പിച്ചർ ചെടികൾ പോലെ പ്രാണിപിടിയൻ സസ്യമാണ് വീനസ് ഫ്ലൈ ട്രാപ്. എലിക്കെണി പോലെയാണ് ഈ ചെടി പ്രവർത്തിക്കുന്നത്. കാഴ്ചയിൽ കക്കയുടെ തോട് തുറന്നു വച്ചതു പോലെയിരിക്കും . വശങ്ങളിൽ കൂർത്ത മുള്ളുകളുണ്ട്. ഉൾവശത്തിന് നല്ല ചുവപ്പ് നിറമാണ്. ഇതിൽ ധാരാളം കൊഴുപ്പ് ദ്രാവകം നിറഞ്ഞിരിക്കും. പ്രാണികൾ ഇതു കുടിക്കാൻ എത്തുന്നതോടെ കെണിയുടെ രണ്ടു ഭാഗങ്ങളും ചേര്‍ന്ന് അടഞ്ഞു തുടങ്ങും. പേടിച്ച പ്രാണി പിടയ്ക്കുന്നതോടെ കെണി പൂർണമായി അടയും. അകത്ത് ഇരയെ ദഹിപ്പിക്കാനുള്ള രാസാഗ്നികള്‍ ധാരാളമുണ്ട്. കുറെ ദിവസം കൊണ്ടാണ് ദഹന പ്രക്രിയ പൂർത്തിയാകുന്നത്. ഇതു കഴിയുമ്പോൾ കെണികള്‍ വീണ്ടും തുറന്നു ദഹിക്കാതെ അവശേഷിക്കുന്ന അവശിഷ്ടങ്ങള്‍ പുറംതള്ളുന്നു. കേട്ടിട്ട് ഒരു ഹൊറർ സിനിമ പോലെ ഉണ്ട്. അല്ലേ?

നിഷ്ക്കളങ്കരല്ലാത്ത സൺഡ്യൂ ചെടികൾ

പേരിലെ മഞ്ഞു തുള്ളിയുടെ നൈർമല്യം ഒന്നു ഈ ചെടിയുടെ സ്വഭാവത്തിൽ ഇല്ല. സൺഡ്യൂ ചെടിയുടെ ഇലകളുടെ മുകൾ ഭാഗം മുഴുവൻ നേർത്ത രോമങ്ങൾ നിറഞ്ഞിരിക്കും. ഇതിൽ പശയുള്ള ഒരു സ്രവം ഉണ്ട്. വെയിലേൽക്കുമ്പോൾ ഇവ മഞ്ഞുതുള്ളി പോലെ തിളങ്ങും. ആകർഷകമായ മണവുമുണ്ട്. ഇതെല്ലാം കണ്ട് എത്തുന്ന പാവം പ്രാണിയുടെ കാര്യം പോക്കു തന്നെ. ഈ ചെടികൾ അവയെ പിടിച്ച് അകത്താക്കും!

ഡാൻസിങ് പ്ലാന്റ്

അടിപൊളി ഡാൻസ് കാഴ്ച വയ്ക്കുന്ന ചെടികളാണ് Codariocalyx motorius. ടെലിഗ്രാഫ് ചെടി എന്നും പേരുണ്ട്. പ്രകാശത്തിനും ഉയർന്ന ആവൃത്തിയിലുള്ള ശബ്ദത്തിനും സ്പർശനത്തിനും എല്ലാം അനുസരിച്ച് ഈ ചെടികൾ പ്രതികരിക്കും. കാഴ്ചയിൽ നല്ലൊന്താരം ഡാൻസ് തന്നെ. നമ്മുടെ നാട്ടിൽ കാണുന്ന തൊഴുകണ്ണി അഥവാ രാമനാമപ്പച്ച ഈ ഇനം ചെടിയാണ്. തൊഴുകണ്ണിയുടെ തണ്ടിലെ ചെറിയ ഇലകൾ എപ്പോഴും വിടരുകയും കൂമ്പുകയും ചെയ്തുകൊണ്ടിരിക്കും. അടുത്തുചെന്ന് സംസാരിച്ചാൽ ഇതിന്റെ ഇലകൾ കൂമ്പി തൊഴുന്നതുപോലെയാകും.

Popular Blogs

രഹസ്യങ്ങൾ ഒളിപ്പിച്ച ശിലകൾ
രഹസ്യങ്ങൾ ഒളിപ്പിച്ച ശിലകൾ ബെൽജിയം–നെതർലൻഡ്സ് അതിർത്തിയിലുള്ള റോമൊന്ത്ബോസ് ക്വാറിയിൽനിന്ന് ഒരു ഭീമൻ പക്ഷിയുടെ ഫോസിൽ ഗവേഷകർ കണ്ടെത്തി. ആധുനിക കാലത്തെ പക്ഷി വിഭാഗത്തിൽപ്പെട്ടവയിലെ ഏറ്റവും പഴക്കംചെന്ന ഫോസിലായിരുന്നു അത്. എന്നുവച്ചാൽ ദിനോസറുകൾക്കൊപ്പം ഭൂമിയിലുണ്ടായിരുന്നതായിരുന്നു ഈ പക്ഷി. ഏകദേശം 6.7 കോടി വർഷം പഴക്കമുള്ളത്. റോമൊന്ത്ബോസ് പാറയിടുക്കുകൾ ഫോസിലുകളുടെ പറുദീസയാണ്. ഫോസിലുകൾ ധാരാളമായി കാണപ്പെടുന്ന ഈ പാറകളെ അവസാദശിലകൾ എന്നാണ് വിളിക്കുന്നത്. അതുപോലെ ഗൃഹ നിർമാണത്തിനുപയോഗിക്കുന്ന ഗ്രാനൈറ്റ്, മാർബിൾ തുടങ്ങിയവയും വിവിധതരത്തിലുള്ള ശിലകളാണ്. ശിലകളെക്കുറിച്ചുള്ള പഠനത്തിന് പെട്രോളജി എന്നാണ് […]
blog image

StudyatChanakya Admin

Jul 29

5:35

കരിയർ ഫ്രണ്ട് – Issue #9 : വിദ്യാര്‍ത്ഥികളുടെ അഭിരുചിക്കനുസരിച്ചുള്ള കരിയര്‍ കണ്ടെത്താന്‍ വിദ്യാ സാരഥി
വിദ്യാര്‍ത്ഥികളുടെ അഭിരുചിക്കനുസരിച്ചുള്ള കരിയര്‍ കണ്ടെത്താന്‍ വിദ്യാ സാരഥി അങ്ങനെ കൂട്ടുകാര്‍ കാത്തിരുന്ന പ്ലസ് ടു ഫലവും വന്നു. അടുത്തത് ജീവിതത്തിന്റെ മുന്നോട്ടുള്ള ഗതി നിര്‍ണ്ണയിക്കുന്ന ഉപരിപഠനമാണ്. ചില കൂട്ടുകാരൊക്കെ ഏത് കോഴ്‌സിനു ചേരണം, ഏത് കരിയറില്‍ എത്തണം എന്നൊക്കെ സ്‌കൂള്‍ കാലഘട്ടത്തില്‍ തന്നെ ആലോചിച്ച് തീരുമാനിച്ചിട്ടുണ്ടാകും. വളരെ നല്ലത്. ഇനി അങ്ങനെ കൃത്യമായ തീരുമാനങ്ങളൊന്നും എടുക്കാത്ത വിദ്യാര്‍ത്ഥികളും വിഷമിക്കേണ്ട. ഇപ്പോള്‍ ആ ചിന്ത തുടങ്ങിയാലും മതി. ജീവിത യാത്രയില്‍ വിജയിക്കാന്‍ ഏത് കോഴ്‌സ് തിരഞ്ഞെടുക്കണം എന്ന തീരുമാനം […]
blog image

Vidya Bibin

Jul 29

4:34

പർവത രാജാക്കന്മാർ
പർവത രാജാക്കന്മാർ ഇന്ത്യ–ചൈന അതിർത്തി തർക്കവുമായി ബന്ധപ്പെട്ട് ഗൽവാൻ, ഫിംഗർ ഫോർ മലനിരകളെക്കുറിച്ചു കൂട്ടുകാർ മാധ്യമങ്ങളിൽ വായിച്ചിട്ടുണ്ടാകും. ലോകത്തിലെ ഏറ്റവും ഉയരം കൂടിയ പർവതനിരയായ ഹിമാലയത്തിന്റെ ഭാഗമാണിവ. ചുറ്റുമുള്ള രാജ്യങ്ങളുടെ അതിർത്തി, കാലാവസ്ഥ, സംസ്കാരം തുടങ്ങിയവയെല്ലാം നിർണയിക്കുന്നതിൽ പർവ്വതങ്ങൾക്കു പ്രധാന പങ്കുണ്ട്. ഇതുപോലെ പല രാജ്യങ്ങളിലായി സ്ഥിതിചെയ്യുന്ന ലോകത്തിലെ പ്രധാന പർവതനിരകളെക്കുറിച്ചറിയാം. ഹിമാലയം ദക്ഷിണേഷ്യയുടെ ജീവനാഡിയാണ് ഹിമാലയം. ഇന്ത്യ, പാക്കിസ്ഥാൻ, ബൂട്ടാൻ, നേപ്പാൾ, ചൈന, മ്യാന്മാർ എന്നീ രാജ്യങ്ങളുടെ ജീവിതവും സംസ്കാരവും ഈ ഹിമനിരകളുമായി ബന്ധപ്പെട്ടിരിക്കുന്നു. ഇന്ത്യ […]
blog image

StudyatChanakya Admin

Jul 22

3:30